Act 6 | SBE | STEP | Mayadaidi ne udiyedi tau hemuliwatani kadi boda wa ye laki ye lau. Luwadi yena, hekadiyo meta Dius tamowaidiyao tau kalina Giliki , yo hekadiyo siya tau kalina Hebelu. Mayadai kesega kesega meta kai se giyagiyahi, na tau kalina Giliki yodi wabuwabu wa se soisoi hemulidi. Unai tau kalina Giliki wa se hetalapili tau kalina Hebelu wa udiyedi.

Acts 6

Apostolo tau saguidi haligigi-labui se kaisunuwaidi

1 Mayadaidi ne udiyedi tau hemuliwatani kadi boda wa ye laki ye lau. Luwadi yena, hekadiyo meta Dius tamowaidiyao tau kalina Giliki ^{▼▼6:1Suau unai se wane ‘Heleni’.}, yo hekadiyo siya tau kalina Hebelu. Mayadai kesega kesega meta kai se giyagiyahi, na tau kalina Giliki yodi wabuwabu wa se soisoi hemulidi. Unai tau kalina Giliki wa se hetalapili tau kalina Hebelu wa udiyedi. 2 Ede apostolo saudoudoi-labui wa tau hemuliwatani maudoidi se yogagogoidi na se wane, “Nige ye namwa bena Yaubada kalinana paisowana ka hekaiyawasi na ka kitalau kai giyahina unai. 3 Unai, kagu kahao, bodamiu ta unai tamowai haligigi-labui kwa kaisunuwaidi, siya meta bena tamowai maudoina yodi hekasisi tamowaidiyao, yo tamowai sibasibadiyao, yo hinage Yaluwa Tabuna ye hemwayaudi. Paisowa ne kabo ka moselaei udiyedi, 4 na kai kabo ka kitalau tapwalolo yo wasaduwai mo unai.”

5 Boda maudoina apostolo yodi nuwatu wa se kawa namwanamwaei. Unai ede Setepano se kaisunuwaei, iya tausunuma bayao, yo Yaluwa Tabuna ye hemwayau; na kabo Pilipo, Polokolas, Nikenowa, Timon, Palamenas, yo Nikolas. Na Nikolas iya Antiyoka tamowaina nabada wa unai ye nuwabui ye hemala Dius. 6 Kabo tamowai wa se laedima apostolo wa udiyedi, na nimadi se tolesaedi kewadi yena na yodi se tapwalolo.

7 Kabo Yaubada wasana wa ye laki ye lau, na Yelusalema unai Yesu tau hemuliwatanina bodana wa ye laki ye lau, yo hinage taukaitalasam bodana lakilakina Yesu se sunumaei yo se kawakabiyei.

Dius tamowaidiyao hekadi Setepano maiyadi se haikawayagala

8 Na Setepano, Yaubada yona kainauya ye mosei iya unai meta ye hegigibwali, ede laulau gigigigibwalidi hekihekinoidiyao ^{▼▼6:8Laulau gigibwalidi wa siya ede hekihekinoi meta Setepano iya Yaubada yona taupaisowa.} ye ginaulidi boda luwadi yena. 9 Na tamowai hekadi maidadi Setepano se haikawayagala, siya meta sunago ^{▼▼6:9Sunago meta Dius yodi kaba koikoigogo yo tapwalolo numana.} hesau tamowaidiyao, na sunago wa hesana ede ‘Yailihai Tamowaidiyao’, na yodi kaba laoma ede Sailini yo Alesandiliya. Na tauhaikawayagala hekadiyo wa yodi kaba laoma ede teha Silisiya yo teha Eisiya. 10 Yodi haikawayagala wa unai nige gonowana Setepano se saedikwai matawuwuna ede Yaluwa Tabuna ye hesibasiba.

11 Kabo nuwatu wadawadam yena tamowai hekadiyo se nuwakoidi bena kabo se hedede se wane, “Setepano yona hedehedede ka lapui meta Mose yo Yaubada ye hededeheyababadi.” 12 Na kabo boda yo yodi tamowai lakilakidiyao, yo hinage laugagayo taulauhekataena nuwadiyao se hesaedi, na Setepano se kabihekahini na se woyaiyama Sunedeli unai. 13 Na tamowai hekadiyo se woyaidima na hedehedede lupolupo maudoidi se hedededi, se wane, “Teina tamowai ta meta huya maudoina numa tabuna yo hinage Mose yona laugagayo ye hedehedede heyababadi. 14 Mata wuwuna ede yona hedehedede ka lapui meta ye wane Yesu Nasaleta tamowaina kabo numa tabuna ta ye hetatagwaligwali na kabikabi beyabeyadi Mose ye haidima wa kabo ye buidi.” 15 Na Sunedeli yona koigogo wa unai taututuli wa se kaikewa dudulai Setepano se kita, na kana kao wa se kita meta doha anelu.